Ukraynanı təmsil edən azərbaycanlı güləşçi dünya çempionatında üçüncü olub

Ukraynanı təmsil edən Aidə Kərimova İspaniyanın Pontevedra şəhərində keçirilən 20 yaşadək güləşçilər arasında dünya çempionatında bürünc medal qazanıb.

"Report"un Şərqi Avropa bürosunun məlumatına görə, o, Ukraynada bu səviyyədə nailiyyət qazanan ilk azərbaycanlıdır.

Ukrayna Azərbaycanlıları Birləşmiş Konqresinin sədri, Ukrayna Millətlər Assambleyasının prezidenti Rövşən Tağıyev Kiyevdə Aidə Kərimova ilə görüşərək onu azərbaycanlılar adından təbrik edib.

Qeyd edək ki, A.Kərimova bundan əvvəl Avropa çempionatında Ukraynanı təmsil edərək qızıl medal qazanıb. Ukraynanın əməkdar məşqçisi Ruslan Savloxovun rəhbərliyi altında hazırlaşan A.Kərimova əslən Azərbaycanın Yevlax rayonundandır və Ukraynanın Donetsk vilayətində doğulub boya-başa çatıb.