Erməni deputat: "Lavrov Ermənistanı məhvə sürükləmək istəyir”

“Rusiyanın xarici işlər naziri Sergey Lavrov Ermənistanı məhvə sürükləmək istəyir”.

“Report” “Novosti Armenia”ya istinadən xəbər verir ki, bunu Ermənistanın hakim “Mülki Müqavilə” parlament fraksiyasından olan deputat Qaqik Melkonyan sentyabrın 11-də parlamentdə keçirdiyi brifinq zamanı bildirib.

“Lavrov ölkəmizi məhvə sürükləmək istəyir. Onun proqramında ermənilər üçün faydalı nə görübsünüz? Rusiya həmişə bizim yerimizə düşünüb, qərar verib, hara getməyi, kimlə dostluq etməyi deyib”, - deputat vurğulayıb.

Q.Melkonyan qeyd edib ki, Ermənistan özünə arxalanmalı, eyni zamanda dostlar axtarmalıdır: “Biz indiyədək həmişə Rusiyaya ümid etmişik. O bizə şərt qoyub: Rusiya Federasiyası, yoxsa Türkiyə. Biz Rusiyanı seçdik. Ancaq dost olacaq başqa ölkələr də var: Hindistan, Avropa ölkələri, ABŞ, İran”.

Deputat Rusiya və Kollektiv Təhlükəsizlik Müqaviləsi Təşkilatına müraciət etməyin mənasız olduğunu bildirib.