SOCAR-ın Türkiyədəki layihələrə investisiyalarının həcmi açıqlanıb

Azərbaycan Dövlət Neft Şirkəti (SOCAR) Türkiyədə fəaliyyət göstərdiyi 17 il ərzində bu ölkəyə 18,5 milyard ABŞ dollarından çox sərmayə qoyub.

“Report”un Türkiyəyə ezam olunmuş müxbiri xəbər verir ki, bunu “SOCAR Turkiye Enerji” şirkətinin baş icraçı direktoru Elçin İbadov İstanbulda keçirilən mətbuat konfransında deyib.

O, “SOCAR Türkiyə Enerji” şirkətinin strukturuna 32 şirkətin daxil olduğunu qeyd edib. "Növbəti beş ildə biz neft emalı və neft-kimya sahəsində yüksək səviyyədə inteqrasiya olunmuş şirkətə çevrilməyi hədəfləyirik", - o bildirib.

E.İbadov əlavə edib ki, şirkət bu dövrdə qaz və enerjinin fasiləsiz və səmərəli təchizatçısına çevrilmək və dayanıqlı inkişafı davam etdirmək niyyətindədir.