Biləsuvarda yol qəzasında motosikletçi ölüb

Biləsuvar rayonunda ağır yol qəzası baş verib.

"Report"un Muğan bürosunun məlumatına görə, hadisə saat 18:00 radələrində Biləsuvar şəhərinin mərkəzindən keçən dolama yolda qeydə alınıb.

Belə ki, hərəkətdə olan motosiklet əvvəlcə "Mercedes" markalı avtomobillə toqquşub. Daha sonra "Ford" markalı yük avtomobilinə çırpılıb.

Hadisə nəticəsində motosikletin sürücüsü, Biləsuvar şəhər sakini, 1992-ci il təvəllüdlü Tamerlan Zakir oğlu Tağıyev müxtəlif bədən xəsarətləri alıb. O ağır vəziyyətdə rayon xəstəxanasına çatdırılıb. Lakin həkimlərin səylərinə baxmayaraq, onun həyatını xilas etmək mümkün olmayıb.

Meyit müayinə olunması üçün morqa təhvil verilib.

Faktla bağlı araşdırmalar davam etdirilir.