Azərbaycanın güləş milliləri təlim-məşq bazasında hazırlıq keçirlər

Azərbaycanın sərbəst, yunan-Roma və qadın güləşçiləri Güləş Federasiyasının təlim-məşq bazasında hazırlıq keçirlər.

"Report" xəbər verir ki, idmançılar məşqçilərin nəzarəti altında həm fiziki, həm də taktiki-texniki çalışmaları yerinə yetirirlər.

Sərbəst güləş üzrə yığmanın bir qrupu yanvarın 19-da Dağıstana yollanacaq. Komandanın əsas heyəti fevralın 1-dək Mahaçqalada təlim-məşq toplanışı keçəcək.

Yunan-Roma və qadın güləşi üzrə millilər isə fevralın 5-dən 9-dək Xorvatiyada gerçəkləşəcək ilin ilk reytinq turnirinə qədər məşqləri doğma məkanda davam etdirəcək. Hər iki komanda “Zaqreb Open”dən sonra qarşıdakı mühüm yarışlara ölkə xaricində hazırlaşacaq.