Venesuela XİN: Maduronun təyyarəsinin ələ keçirilməsi piratlıq aktıdır

ABŞ hökumətinin Venesuela Prezidenti Nikolas Maduronun istifadə etdiyi təyyarəni ələ keçirməsi piratlıq aktından və “qaydalara əsaslanan nizam” nümunəsindən başqa bir şey deyil.

"Report"un məlumatına görə, bu barədə Venesuela Xarici İşlər Nazirliyinin dərc olunmuş bəyanatında deyilir.

“Venesuela təyyarəsinin bu həbsi, beynəlxalq hüquqa məhəl qoymayaraq, güclülərin qanununu bərqərar etməyə, öz maraqlarına uyğun qaydalar yaratmağa və onlara tam cəzasızlıqla əməl etməyə çalışan “qaydalara əsaslanan nizam”ın nümunəsidir”, - xarici siyasət idarəsi bildirib.

"Birləşmiş Ştatlar nümayiş etdirdi ki, iqtisadi və hərbi gücündən Dominikan Respublikası kimi dövlətləri qorxutmaq və onların cinayət əməllərində şərik olmaq üçün onlara təzyiq üçün istifadə edir", - XİN əlavə edib.

Venesuelalı diplomatlar qeyd ediblər ki, ABŞ hakimiyyəti növbəti dəfə respublika prezidentinin istifadə etdiyi təyyarəni qanunsuz olaraq müsadirə etməklə yalnız piratlıq kimi təsnif oluna bilən cinayət əməllərinə əl atıb. “Onlar öz hərəkətlərini bütün dünyada birtərəfli və qeyri-qanuni şəkildə tətbiq etdikləri məcburiyyət tədbirləri ilə əsaslandırırlar”, - bəyanatda bildirilir.

Xarici İşlər Nazirliyi əlavə edib ki, Venesuela dövlətə dəymiş bu zərərin, eləcə də cinayət siyasəti nəticəsində birtərəfli məcburiyyət tədbirləri nəticəsində dəymiş hər hansı digər zərərin ödənilməsi üçün istənilən hüquqi tədbir görmək hüququnu özündə saxlayır.