Polşa Belarusla sərhədə əlavə 500 polis göndərir

Polşa hakimiyyəti Belarusla sərhədə 500 polis və terrorla mübarizə bölmələrinin əməkdaşlarını göndərmək qərarına gəlib.

“Report” xəbər verir ki, bu barədə tviter hesabında Polşanın daxili işlər naziri Mariuş Kaminski yazıb.

“Belarusla sərhəddə yaranmış gərgin vəziyyətlə əlaqədar olaraq mən qüvvələrimizi cinayətlərin qarşısının alınması idarəsinin və terrorla mübarizə bölmələrinin 500 nəfərlik polis zabiti ilə gücləndirmək qərarına gəldim”, o yazıb.

Nazir qeyd edib ki, bu qüvvələr Polşa sərhədinin təhlükəsizliyini təmin edən 5 min sərhədçi və 2 min hərbi qulluqçuya qoşulacaq.