ABŞ bir neçə gündə "Qızıl kart" satışından 1,3 milyard dollar əldə edib

ABŞ son günlərdə ölkədə yaşayış hüququ verən "Qızıl kart" satışından 1,3 milyard dollar gəlir əldə edib.

"Report"un məlumatına görə, bunu ticarət naziri Hovard Latnik açıqlayıb.

Latnik qeyd edib ki, satışlar cəmi bir neçə gün ərzində bu məbləğə çatıb. Onun sözlərinə görə, hazırda "Qızıl kart" vasitəsilə leqallaşma imkanı ABŞ Daxili Təhlükəsizlik Nazirliyinə müraciətin işlənməsi üçün 15 min dollar rüsum ödənildikdən sonra təqdim olunur. Müraciət təsdiqləndiyi halda, namizəd əlavə olaraq ABŞ hökumətinə 1 milyon dollar ödəməlidir. Rəsmilər sürətli baxış və "Green card" verilməsini vəd edirlər.