Bu il Azərbaycanda "Milli ixrac strategiyası" təsdiqlənə bilər

İxracın və İnvestisiyaların Təşviqi Agentliyi (AZPROMO) bu ilin 1-ci rübü ərzində "Milli ixrac strategiyası"nın təsdiq edilməsini gözləyir.

"Report" xəbər verir ki, bunu Bakıda keçirilən Milli İxracatçılar və İdxalçılar Forumunda Agentliyin icraçı direktorunun müşaviri Tural Hacılı bildirib.

"Strategiya yaxın 4 ili əhatə edəcək, Azərbaycan ixracına müsbət təsir göstərəcək. Dürüstləşmiş məlumatlara görə, ötən il Azərbaycanın qeyri-neft ixracının dəyəri 12 % artaraq 3 milyard ABŞ dollarını keçib. Belə artıma kənd təsərrüfatı məhsullarının emalı - emal sənayesi məhsullarının ixracı sayəsində nail olunub. Bu, bizim üçün böyük nailiyyətdir, müstəqillik tariximizdə qeydə alınmış ən yüksək göstəricidir", - deyə o qeyd edib.