Azərbaycanın bizneslə bağlı mütərəqqi islahatları Avropada tanıdılıb

Azərbaycan Portuqaliyanın Lissabon şəhərində Avropa Biznes Qeydiyyatçıları Assosiasiyasının (EBRA) “Şirkətlər haqqında qanun və açıq məlumat” və “Benefisiar mülkiyyətçilik” işçi qruplarının hibrid formatında görüşündə iştirak edib.

"Report" xəbər verir ki, tədbirdə Azərbaycanı İqtisadiyyat Nazirliyi yanında Dövlət Vergi Xidmətinin (DVX) Vergi ödəyicilərinin qeydiyyatı və uçotu baş idarəsinin rəisi Mirzə Mirzəyev və Maliyyə monitorinqi şöbəsinin rəisi Orxan Abdinov təmsil edib.

Məlumata görə, müzakirələr zamanı Azərbaycanın biznesin qeydiyyatı sahəsində qabaqcıl təcrübəsi, mütərəqqi islahatları və əldə edilmiş uğurlu nəticələr barədə məlumat verilib.

Tədbirdə biznes subyektləri üçün qlobal çağırışlar şəraitində fəaliyyət istiqamətlərinin müzakirə edildiyi görüşlərdə şəffaflıq, şirkətlərin hüquqi strukturlarının təkmilləşdirilməsi və mülkiyyətçiliklə bağlı açıq məlumatların təmin olunması məsələləri gündəmə gətirilib. İştirakçılar əməkdaşlıq perspektivlərini müzakirə edərək, “Şirkətlər haqqında qanun və açıq məlumat” və “Benefisiar mülkiyyətçilik” sahələrində birgə fəaliyyətin əhəmiyyətinə diqqət çəkiblər.

Qeyd edək ki, EBRA 2019-cu ilin aprelində Avropa Biznes Qeydiyyatçıları və Avropa Ticarət Qeydiyyatçıları Forumunun koalisiyası yolu ilə təsis olunub. Həm üzv dövlətlər, həm də üçüncü ölkələr üçün körpü rolunu oynayan EBRA-nın 36 ölkədən 43 üzvü var ki, onlardan 37-i tamhüquqlu, 4-ü isə assosiativ üzvlərdir. İqtisadiyyat Nazirliyi yanında Dövlət Vergi Xidməti təşkilatın tamhüquqlu üzvüdür.