İrəvan aeroportunda aclıq aksiyası keçirmiş jurnalist Fransaya qayıdıb

İrəvanın “Zvartnots” hava limanında 41 gün aclıq aksiyası keçirmiş erməniəsilli fransız jurnalist Leo Nikolyan ölkəsinə qayıdıb.

“Report” xəbər verir ki, bu barədə “Sputnik-Armeniya” məlumat yayıb.

L.Nikolyan, sosial şəbəkədə canlı yayımda 19 kiloqram arıqladığını qeyd edib: “Mübarizəni davam etdirmək üçün özümə gəlməliyəm, sağlamlığımı yaxşılaşdırmalı, yemək yeməliyəm”.

Jurnalist bildirib ki, mübarizəni davam etdirəcək. O, Fransa Milli Assambleyasına getmək və Ermənistanda baş verənlərlə bağlı danışmaq niyyətindədir.

Qeyd edək ki, L.Nikolyan İrəvanın “Zvartnots” hava limanında qeydə aldığı videomüraciətində bildirdiyi kimi Ermənistana buraxılmayıb. Pasport nəzarətindən keçən zaman jurnalistə Ermənistana girişinin qadağan edildiyi bildirilib. Buna etiraz olaraq o, hava limanında qalıb və aclıq aksiyasına başlayıb.