CENTCOM: Xarq adasında İranın 90 hərbi hədəfi məhv edilib - YENİLƏNİB-2

ABŞ Silahlı Qüvvələri Xarq adasında neft infrastrukturundan yan keçməklə İranın 90-dan çox hərbi hədəfini məhv edib.

"Report" xəbər verir ki, bu barədə ABŞ Silahlı Qüvvələri Mərkəzi Komandanlığının (CENTCOM) məlumatında deyilir.

"Ötən gecə ABŞ qoşunları İranın Xarq adasına genişmiqyaslı dəqiq zərbə endirib. Nəticədə dəniz minaları anbarları, raket saxlama bunkerləri və bir sıra digər hərbi obyektlər məhv edilib", - məlumatda qeyd olunur.

13:28

ABŞ Silahlı Qüvvələrinin Xarq adasında endirdiyi zərbələr nəticəsində hərbi anbarlar məhv edilib.

"Report" xəbər verir ki, bu barədə CNN telekanalı ABŞ hərbi mənbələrinə istinadən məlumat yayıb.

Qeyd olunur ki, zərbələr yeraltı raket bunkerləri, dəniz minaları anbarları və digər hərbi infrastruktura endirilib.

07:10

İranın əsas neft ixracı terminallarından birinin yerləşdiyi Xarq adasındakı neft obyektlərinə Amerika Hərbi Hava Qüvvələrinin hava hücumu nəticəsində hər hansı zərər dəyməyib.

"Report" xəbər verir ki, bu barədə İranın "Fars" agentliyi məlumat yayıb.

Məlumata görə, adanın bombardman edilməsi zamanı azı 15 partlayış səsi eşidilib.

Agentlik iddia edib ki, ABŞ tərəfindən endirilən zərbələr nəticəsində neft infrastrukturunun heç bir obyekti zədələnməyib. Qeyd olunub ki, hücumlara Xarq ərazisindəki müdafiə obyektləri, hərbi dəniz bazası, aerodrom və helikopter anqarı da məruz qalıb.

Bundan əvvəl ABŞ Prezidenti Donald Tramp bəyan etmişdi ki, Amerika Silahlı Qüvvələri İranın Xarq adasındakı hərbi obyektlərə genişmiqyaslı zərbə endirib. Bombardmanın hədəfləri hərbi obyektlər olub. ABŞ dövlət başçısı qeyd edib ki, adada yerləşən neft infrastrukturunu məhv etməmək barədə qərar qəbul edib.