Parisdə "Divanü Lüğat-it-Türk"ün 950-ci ildönümü ilə bağlı beynəlxalq konfrans keçirilib

Fransanın paytaxtı Parisdə "Dünyanın leksikoqrafiyada xəritələşdirilməsi: "Divanü Lüğat-it-Türk"ün 950-ci ildönümü" mövzusunda beynəlxalq konfrans öz işinə başlayıb.

"Report"un yerli bürosu xəbər verir ki, UNESKO-nun Parisdəki qərargahında baş tutan konfransda qurumun rəsmiləri, habelə Baş katibin müavini Firmin Edouard Matoko, Azərbaycan Respublikasının UNESKO yanında daimi nümayəndəsi Elman Abdullayev, Azərbaycanın Fransadakı səfiri Leyla Abdullayeva, Beynəlxalq Türk Mədəniyyəti və İrsi Fondunun (BTMİF) prezidenti Aktotı Raimkulova, Xarici İşlər Nazirliyinin xüsusi tapşırıqlar üzrə səfiri, UNESCO üzrə Milli Komissiyanın Baş katibi Seymur Fətəliyev, qurumun Türk dövlətlərinin UNESCO üzrə Milli Komissiyalarının Baş katibləri, bu ölkələrin həmin təşkilatdakı Daimi Nümayəndələri və digər şəxslər iştirak ediblər.

Tədbirin məqsədi "Divanü Lüğat-it-Türk"ün dünya mədəniyyətinə, eyni zamanda Türk xalqlarının dilinin inkişafı və mədəni irsinə qatdığı töhfələri işıqlandırmaqdır.

Azərbaycanın UNESKO yanında daimi nümayəndəsi Elman Abdullayev "Divanü Lüğat-it-Türk"ün öyrənilməsinin dilçiliyimizdə hər zaman böyük diqqət ayrıldığını bildirib.

Tədbirdə çıxış edən UNESCO üzrə Milli Komissiyanın Baş katibi Seymur Fətəliyev Türk dövlətlərinin irsini və mədəniyyətini qorumağa töhfə verən bütün təşəbbüslərin Azərbaycanın UNESCO üzrə Milli Komissiyası tərəfindən dəstəkləndiyini qeyd edib.

Tədbirdə çıxış edən UNESKO-nun Baş katibinin müavini Firmin Edouard Matoko UNESKO çərçivəsində Türk xalqlarının mədəniyyətlərinə və irsinə göstərilən yüksək diqqətə toxunub, UNESKO-nun bu mövzuya ayırdığı xüsusi diqqətdən danışıb.

Tədbirdə çıxış edən Beynəlxalq Türk Mədəniyyəti və İrsi Fondunun (BTMİF) prezidenti Aktotı Raimkulova Türk mədəniyyətlərinin, irsinin qorunması və inkişafına Azərbaycanın verdiyi əvəzsiz töhfələrə toxunub. O prezidenti olduğu fondun Azərbaycanın təşəbbüsü ilə yaradıldığını bildirib, fondun fəaliyyətindən, Divanü Lüğat-it-Türk"ün qorunmasının vacibliyindən danışıb.

Konfransda çıxış edən azərbaycanlı alim, professor, türkşünas Həsən Həsənov Mahmud Kaşğari irsi ilə bağlı araşdırmalarını təqdim edib.

Azərbaycanlı alim, professor, Azərbaycan Milli Elmlər Akademiyasının prezidenti İsa Həbibbəyli isə "Divanü Lüğat-it-Türk"ün Azərbaycanda öyrənilməsindan, əhəmiyyətindən, ölkədə bu mövzuda aparılan araşdırmalardan bəhs edib.

Konfrans çərçivəsində Azərbaycan, Qazaxıstan, Qırğızıstan, Türkiyə, Özbəkistan, Türkmənistan, Macarıstan və digər ölkələrdən alimlər, tədqiqatçılar əsərin tarixi, dilçilik və mədəni əhəmiyyətini müzakirə edirlər. Müzakirələr Mahmud Kaşğarinin "Divani lüğət-it-türk" əsərinin qrammatik xüsusiyyətləri, rus dilinə tərcüməsi, ərəbdilli xalqların türk dilini öyrənmələrinə verdiyi töhfəsi və digər mövzular ətrafında davam edib