"Murov"un voleybolçusu: "Avstriya komandasına da qalib gəlmək istəyirik"

"Çağırış Kubokunda Avstriya komandasına da qalib gəlmək niyyətindəyik".

Bunu "Report"un Zəngilana ezam olunmuş əməkdaşına açıqlamasında kişi voleybolçulardan ibarət "Murov" klubunun üzvü Yusif Bünyatov deyib.

Oyunçu turnirdə 1/8 final mərhələsinə vəsiqə qazanmaq istədiklərini bildirib.

Bünyatov 1/32 finalda Xorvatiya təmsilçisi "Kitro Varazdin"ə qalib gəldikləri görüşlər haqqında da fikirlərini bölüşüb: "İlk qarşılaşma rahat keçdi və 3:0 hesabı ilə qalib gəldik. Cavab matçı bir az gərgin alındı. Buna baxmayaraq rəqibi 3:1 hesabı ilə üstələyə bildik".

Zəngilan hava limanının ilk mülkü sərnişənlərindən olan voleybolçu bunun gözəl hiss olduğunu diqqətə çatdırıb: "Burada abu-hava yaxşıdır. İlk sərnişin kimi buraya gəlmək çox mənalı və gözəl hissdir".

Qeyd edək ki, "Murov" 1/16 final mərhələsində Avstriya "UVC Graz"ı ilə üz-üzə gələcək.