FHN-in kişilərdən ibarət voleybol komandası yarışın çempionu olub

Gənclər və İdman Nazirliyinin voleybol zalında Azərbaycan Voleybol Federasiyası, Gənclər və İdman Nazirliyinin təşkilatçılığı ilə dövlət qurumları arasında voleybol yarışı keçirilib.

Fövqəladə Hallar Nazirliyindən “Report”a verilən məlumata görə, yarışda iştirak edən FHN-in kişilərdən ibarət komandası yüksək nəticə göstərib.

Belə ki, 9 kollektivin iştirak etdiyi yarışda FHN-in komandası rəqiblərinə qalib gələrək finala yüksəlib. Finalda isə SOCAR komandası ilə üz-üzə gələn FHN-in komandası 2:0 hesablı qələbə ilə yarışın çempionu adını qazanıb.

Qaliblərə Gənclər və İdman Nazirliyinin təsis etdiyi kubok və medallar təqdim edilib.