Batumidə keçirilən turnirdə iştirak edən karateçilər Vətənə qayıdıblar

Gürcüstanın Batumi şəhərində keçirilən “Batumi Open” beynəlxalq karate turnirində iştirak edən Azərbaycan Karate-Do Federasiyasının üzvləri Vətənə qayıdıblar.

“Report”un məlumatına görə, Heydər Əliyev Beynəlxalq Aeroportunda idmançıların qarşılanma mərasimi olub.

Mərasimdə idmançıların yaxınları, federasiya rəsmiləri, azarkeşlər, idman ictimaiyyəti, media mənsubları, ictimaiyyət nümayəndələri iştirak ediblər.

Batumidə keçirilən beynəlxalq turnirdə Azərbaycanı təmsil edən karateçi Zəki Cəfərzadə deyib ki, onlar yarışa çox yaxşı bir formada hazırlaşıblar:

“Biz əlimizdən gələni etdik ki, onlarla heç bir problem yaranmasın. Lakin onlar bizim bayrağımızın üzərinə Ermənistanın bayrağını qoydular. Mən bunu ilk gördüyüm anda reaksiya verərək, iradımı bildirdim. Hər şeydən əvvəl bir azərbaycanlı vətəndaş kimi bayrağımıza qarşı edilən hörmətsizliyi cavabsız qoymadım”.

Azərbaycan karate milli yığmasının baş məşqçisi İbrahim Heydər isə vurğulayıb ki, Azərbaycan komanda hesabı ilə Batumidə beynəlxalq turnirdə birinci yerə çıxıb: “Bizim güclü idmançılarımız var. Bu səbəbdən də bu nəticə gözlənilən idi. Qarşıdan bizi dünya çempionatı gözləyir. Batumidə keçirilən bu turnir bizim idmançılar üçün bir növ yoxlama xarakteri daşıyırdı. Qazanılan qələbə münasibətilə bütün karate ailəsini və xalqımızı təbrik edirəm”.

Qeyd edək ki, Batumidə keçirilən karate çempionatında növbəti erməni təxribatı qeydə alınıb. Azərbaycanlı karateçi Alika Semihova finalda erməni rəqibinə qalib gəlib. Məğlub olduğu ilə barışmayan erməni karateçi ona əl uzadan idmançımızı vurub.

Daha sonra təxribat törədən erməni idmançı yarışdan kənarlaşdırılıb. Erməni idmançı həmçinin finalda təmsilçimizə uduzaraq qazandığı gümüş medaldan da məhrum olub.