Rəhman Hümmətov: "Bakı metrosu üçün bu il yeni nəsil vaqonlar gətiriləcək"

Bu il Bakı metrosuna 20 yeni nəsil vaqonun gətirilməsi planlaşdırılır.

“Report” xəbər verir ki, bunu rəqəmsal inkişaf və nəqliyyat nazirinin müavini Rəhman Hümmətov nəqliyyat sahəsində 2024-cü ildə həyata keçirilən tədbirlər və 2025-ci il üçün planlar ilə bağlı keçirilən brifinqdə bildirib.

Nazir müavini qeyd edib ki, son illərdə Bakıda 7 metro stansiya və 1 depo inşa edilərək istifadəyə verilib:

“Bakıya 150 yeni nəsil vaqon gətirilərək istismara verilib. Nəticədə metroda istifadə olunan vaqonların yarısı artıq yeni nəsil vaqonlardır. Dəmiryolu sahəsində də mühüm işlər görülüb. İnşa edilən və modernizasiya olunan dəmiryolu xətlərinin ümumi uzunluğu 1 500 kilometri keçib”.

Xatırladaq ki, yaxın 3 ildə, Rusiyanın “Transmaşholdinq” şirkəti ilə imzalanmış müqaviləyə əsasən, metroda 65 yeni nəsil vaqonu və yaxud hər biri 5 vaqondan ibarət olan 13 qatar xəttə buraxılacaq. Ötən il üçün nəzərdə tutulan 7 qatardan 4-ü Bakıya çatdırılıb. Bu qatarlar əsasən "Həzi-Aslanov"-"Dərnəgül" xətti üzrə hərəkət edəcək.

Beləliklə bu il 4 qatarın, 2026-cı ildə isə 2 qatarın Bakıya çatdırılması planlaşdırılır.