Saməddin Əsədov: "Peyklərin idarə edilməsi üçün alternativ nöqtələrimiz var"

Kosmos sahəsi kifayət qədər konservativ və risk yönümlü oduğu üçün peyklərin idarə edilməsi üçün Azərbaycanın alternativ nöqtələri də var.

“Report” xəbər verir ki, bunu Rəqəmsal İnkişaf və Nəqliyyat Nazirliyi yanında Kosmik Agentliyinin ("Azərkosmos") İdarə Heyətinin sədri Saməddin Əsədov Milli Məclisin İqtisadi siyasət, sənaye və sahibkarlıq komitəsinin iclasında "Kosmik fəaliyyət haqqında" Qanun layihəsinin müzakirəsi zamanı deyib.

"Belə ki, Bakıda hansısa fövqəladə problemlər yaranarsa, Naxçıvandan da peyklərimizi idarə etmək mümkündür.

Hazırda orbitdə üç peykimiz var. "Azərsky”– Yerin məsafədən müşahidə peyki keçən ay öz missiyasını yekunlaşdırıb. Yaxın gələcəkdə Azərbaycana məxsus kosmik peyklərin sayı artırılacaq”, - deyə S.Əsədov bildirib.