Gəncədə fərdi evdən oğurluq edilib

Gəncə şəhər 4-cü mikrorayon ərazisində yerləşən fərdi evlərin birindən oğurluq edilib.

"Report"un Qərb bürosunun məlumatına görə, hadisə Gəncə şəhər sakini Elnur Heydərova məxsus fərdi yaşayış evində qeydə alınıb.

Zərər çəkənin bildirdiyinə görə, oğurluq edən şəxs və ya şəxslər hasardan düşərək evin seyf qapısının kilidini sındıraraq içəri daxil olublar. Təmir işləri aparılan evdən təxmini ümumi dəyəri 3 000 manat olan ustalara məxsus texniki avadanlıqlar və alətlər, həmçinin mühərrik və istilik sisteminə aid qurğuları oğurlayıblar.

Hadisə ilə bağlı Kəpəz Rayon Polis İdarəsinə məlumat verilib, araşdırma aparılır.