Türkiyə millisinin futbolçusu barmağı qırıldığı üçün heyətdən çıxarılıb

Futbol üzrə Türkiyə millisinin heyətində dəyişiklik edilib.

"Report" yerli federasiyanın rəsmi saytına istinadən xəbər verir ki, "Beşiktaş" klubundan yığmaya çağırılan Kenan Karamanı "Qalatasaray"dan Halil Dervişoğlu əvəzləyib.

Buna 27 yaşlı hücumçunun Superliqanın VII turunda səfərdə "Altay"la matçda əl barmağının qırılması səbəb olub.

Qeyd edək ki, 2022-ci il dünya çempionatının seçmə mərhələsində oktyabrın 8-də Norveçi qəbul edəcək Türkiyə millisi bundan 3 gün sonra Latviyanın qonağı olacaq.