İspaniya yığmasının zədəli müdafiəçisi dünya çempionatınadək sağalacaq

Bakı. 28 may. REPORT.AZ/ İspaniya milli komandasının və "Real Madrid" klubunun futbolçusu Daniel Karvaxal Çempionlar Liqasının finalında İngiltərə "Liverpul"u ilə oyunda aldığı zədədən sonra əlavə müayinədən keçib. 

"Report"un "Marca"ya istinadən verdiyi məlumata görə, 26 yaşlı müdafiəçinin sağ baldırın arxa əzələlərində problem aşkarlanıb. Lakin Karvaxalın əvvəlcədən güman edildiyi qədər ciddi xəsarətlə üzləşmədiyi və dünya çempionatına yollana biləcəyi müəyyənləşib. O, 2-3 həftəyə tam sağalacaq. Ən pis halda, sağ cinah oyunçusu iyunun 15-də Portuqaliyaya qarşı keçirəcəkləri ilk oyunu buraxacaq. 

Qeyd edək ki, B qrupunda İspaniya yığmasının digər rəqibləri Mərakeş və İran olacaq.