Avrokubokların final oyunları üçün hakim təyinatları açıqlanıb

Bakı. 7 may. REPORT.AZ/ Avrokubokların final oyunları üçün hakim təyinatları açıqlanıb.

"Report"un UEFA-nın rəsmi saytına istinadən verdiyi məlumata görə, İspaniyanın "Real Madrid" və İngiltərənin "Liverpul" komandaları arasında keçiriləcək Çempionlar Liqasının final görüşünü serbiyalı hakimlər briqadası idarə edəcək. Oyunun baş hakimi Milorad Majiç olacaq.

Avropa Liqasının final matçı isə hollandiyalı hakimlərə həvalə olunub. İspaniyanın "Atletiko" və Fransanın "Marsel" komandalarının qarşılaşmasında baş hakim funksiyasını Byorn Kyupers yerinə yetirəcək.

Qeyd edək ki, "Real Madrid" - "Liverpul" matçı mayın 26-da Ukraynanın "Olimpiyski" stadionunda keçiriləcək. "Marsel" - "Atletiko" qarşılaşması isə mayın 16-ı Fransanın Lyon şəhərindəki eyniadlı stadionda baş tutacaq.