Konstruktorlar Kuboku: "Mercedes" Bakıdakı yarışdan sonra ikinci pilləyə yüksəlib

"Formula 1" üzrə dünya çempionatında çıxış edən "Mercedes" komandası Konstruktorlar Kubokunda ikinci pilləyə yüksəlib.

"Report"un məlumatına görə, bu, Bakıda keçirilən Azərbaycan Qran-prisinin nəticələrinə əsasən reallaşıb.

Komanda üzvlərindən Corc Rassell ikinci, Kimi Antonelli dördüncü olub.

Beləliklə, "Mercedes" xallarının sayını 290-a çatdıraraq "Ferrari"ni (286 xal) keçib. "Maklaren" isə vahid liderdir - 623 xal.

Bakıdakı əsas yarışda qəza törədən "Maklaren" pilotu Oskar Piastri (324 xal) sürücülərin mübarizəsində hələ də birincidir. Onun komanda yoldaşı Lando Norris xallarının sayını 299-a çatdırıb. Azərbaycan Qran-prisinin builki qalibi Maks Ferstappen ("Red Bull") isə üçüncü sıradadır - 255 xal.