Norveç kralı həftənin sonuna xəstəliyə görə məzuniyyətə çıxıb

Norveç kralı V Harald səhhəti ilə əlaqədar səlahiyyətlərinin icrasını dayandırıb.

“Report” xəbər verir ki, bu barədə kral sarayının yaydığı press-relizdə bildirilib.

“Əlahəzrət Kral sağalmaqdadır, lakin həftənin sonuna qədər xəstəlik məzuniyyətində qalacaq”, - məlumatda deyilir.

Parlament nümayəndələrinin sarayda qəbulu planlaşdırıldığı kimi sabah baş tutacaq. Norveç vəliəhdi Hokon kralın yerinə ev sahibi olacaq.

Qeyd edək ki, Norveç kralının 86 yaşı var. O, daha əvvəl 2022-ci ilin avqust və dekabr aylarında və 2023-cü ilin mayında xəstəxanaya yerləşdirilib.