Mozambikdə həftə ərzində hökumət əleyhinə etirazlarda 134 nəfər ölüb

Mozambikdə müxalifətin hökumət əleyhinə təşkil etdiyi kütləvi nümayişlər nəticəsində həftənin əvvəlindən azı 134 nəfər ölüb.

"Report" xəbər verir ki, bu barədə "Lusa" agentliyi müxalif "Decide" qeyri-hökumət təşkilatına istinadən məlumat yayıb.

Oktyabrın 24-də başlayan iğtişaşlar zamanı ölənlərin sayı 261 nəfərə çatıb, yaralı sayı 573 nəfərdir.

Qeyd edilir ki, həftə ərzində 161 nəfər saxlanılıb. Son iki ayda saxlanılanların sayı 4 199 nəfərdir.

Mozambikin "Notisias" qəzetinin məlumatına görə, müxalifətin törətdiyi iğtişaşlar ölkədə xaosa və geniş dağıntılara səbəb olub. Etiraz aksiyaları yolların bağlanması, yanan təkərlərdən barrikadaların qurulması, dövlət və şəxsi mülkiyyətin dağıdılması ilə müşayiət olunur.