Kanada gələn il NASAMS kompleksini Ukraynaya verəcək

Kanada 2025-ci ilin əvvəlində Ukraynaya NASAMS zenit-raket kompleksi verməyi planlaşdırır.

"Report" xəbər verir ki, bu barədə CBC telekanalı Kanadanın milli müdafiə naziri Vilyam Blerə istinadən məlumat yayıb.

Onun sözlərinə görə, zenit-raket kompleksinin növbəti partiyası bu ilin sonunda “Raytheon” və “Kongsberg” şirkətləri tərəfindən ABŞ-də istehsal olunacaq, 2025-ci ilin əvvəlində isə Kanadanın aldığı komplekslərdən biri Kiyevə veriləcək.

Kanada hökuməti 2023-cü il yanvarın 11-də Ukraynanın ehtiyacları üçün ABŞ-dən 406 milyon Kanada dollarına (o zaman təxminən 303 milyon ABŞ dolları) NASAMS zenit-raket kompleksini alacağını elan etmişdi.