Bavariyada avtobusun aşması nəticəsində iki nəfər ölüb, 25 nəfər yaralanıb

Yuxarı Bavariyada (Almaniya) turistləri daşıyan avtobusun iştirakı ilə baş vermiş yol-nəqliyyat hadisəsi nəticəsində iki nəfər ölüb, 25 nəfər isə xəsarət alıb.

"Report" xəbər verir ki, bu barədə "T-online" xəbər portalı yerli polisə istinadən məlumat yayıb.

Məlumata görə, hadisə bazar günü səhər tezdən Ostallqau regionunun Buxloe şəhəri ərazisindəki "A96" federal magistralında baş verib.

İlkin məlumatlara görə, içərisində filippinli 40-50 nəfərlik turist qrupunun olduğu avtobus yoldan çıxaraq dərəyə aşıb.

Hadisə nəticəsində 25-ə yaxın insan xəsarət alıb, iki nəfər hadisə yerində ölüb. Xəsarət alanlardan birinin vəziyyəti kritikdir.