Al Jazeera: İsrailin Qəzzanın şimalına hava zərbələri nəticəsində 70-dən çox fələstinli həlak olub

Qəzza zolağının şimalında yerləşən Beyt-Lahiya şəhərinə axşam İsrail Hərbi Hava Qüvvələri tərəfindən endirilmiş zərbələr nəticəsində azı 73 nəfər həlak olub.

“Report” xəbər verir ki, bu barədə “Al Jazeera” telekanalı məlumat yayıb.

WAFA agentliyi öz növbəsində bildirib ki, bombardman nəticəsində yaşayış məhəlləsi tamamilə məhv edilib. Onlarla insan yaralanıb. Bir çoxları dağılmış binaların altında qalıb.

Bundan əlavə, yerli xəstəxananın həyətində sığınacaq tapan bir qrup fələstinli İsrailin dronu tərəfindən atəşə tutulub. Həmçinin təcili yardım maşınına birbaşa zərbə endirilib.

Yerli Səhiyyə Nazirliyinin məlumatına görə, 2023-cü ilin oktyabrından bəri anklavda münaqişənin eskalasiyası sonucunda ümumilikdə 42,5 min fələstinli həlak olub, 100 minə yaxın insan yaralanıb.