Şuşada növbədənkənar prezident seçkilərində mindən artıq seçici səs verəcək

Fevralın 7-də keçiriləcək növbədənkənar prezident seçkilərində Şuşada 1 189 nəfər seçici səs verəcək.

Bunu “Report”un Şuşa şəhərinə ezam olunmuş əməkdaşına açıqlamasında 124 saylı Şuşa-Ağdam-Xocalı-Xocavənd dairəsinin azad edilən Şuşa şəhərində yeni yaradılan 105 saylı seçki məntəqəsinin katibi Elnur Məhərrəmov deyib.

O bildirib ki, məntəqədə 7 fevral növbədənkənar prezident seçkiləri günü 1 189 nəfər seçici səs verəcək və artıq bildirişlərin paylanması prosesi başa çatıb.

Elnur Məhərrəmov

“Sevindirici haldır ki, seçicilər özləri məntəqəyə gələrək prezident seçkilərinə xüsusi maraq göstərirlər. İndiyə kimi bir çox seçicilərimiz yaşadıqları yerdən çıxarış vərəqələri alaraq burada səs verməyə can atırlar. Bu baxımdan deyə bilərəm ki, builki seçkilərə xüsusi fəallıq var”, - o deyib.