Naxçıvanın avtomobil yollarında qışa hazırlıq başa çatıb

Naxçıvan Muxtar Respublikasının avtomobil yollarınının qış mövsümünə hazırlığı başa çatdırılıb.

Naxçıvan Muxtar Respublikası Avtomobil Yolları Dövlət Agentliyinin əməkdaşı Talıb Babayev “Report”un yerli bürosuna bildirib ki, aidiyyəti qurumlar ucqar və dağ yaşayış məntəqələrində yağıntılı günlər üçün bütün ehtiyat tədbirlərini görüb. Bununla belə qarlı, buzlu günlərdə yollara səpilməsi üçün qum və duz qarışığından ibarət ehtiyatlar yığılıb.

"Vacib olan yol texnikası təmir olunaraq saz vəziyyətə gətirilib. Artıq ucqar dağ kəndlərinə ağır yol texnikası, buldozerlər yerləşdirilib. Həmin kəndlərdə yanacaq-sürtkü materialı ehtiyatı yaradılıb", - agentlik əməkdaşı qeyd edib.

T.Babayev vurğulayıb ki, hazırda ehtiyatda 1 000 kubmetr qum və duz qarışığından ibarət ehtiyat var və bunu ilin sonuna qədər 1 500 kubmetrə çatdırmaq nəzərdə tutulub.