Laçına qayıdan keçmiş məcburi köçkün: Bundan böyük sevinc ola bilməz

Allah şəhidlərimizə rəhmət eləsin, qazilərimizə, Ali Baş Komandanımıza cansağlığı versin. Bu günümüzə şükür edirəm.

"Report" xəbər verir ki, bunu Laçına köç edən Famil İsmayılov jurnalistlərə açıqlamasında deyib.

F. İsmayılov doğma yurda qayıtmalarının səbəbkarları olan şəhidlərin valideynlərinə ehtiramını bildirib:

"İllər sonra Laçına qayıdıram, bundan böyük sevinc ola bilməz. Bizə bu sevinci yaşadan şəhidlərimizin valideynlərinə, yaxınlarına səbir arzulayır, onların ruhu qarşısında baş əyirəm".

Digər Laçın sakini Camal Adıgözəlov isə məcburi köçkün düşəndə 37 yaşı olduğunu bildirib: "İndi 70 yaşım var. Bu günə şükür ki, öz rayonuma qayıdıram".

C. Adıgözəlov da şəhidlərin ruhuna ehtiramını bildirib, qazilərə cansağlığı arzulayıb.