Pekin Azərbaycanın ŞƏT-də statusunun yüksəldilməsi planlarını dəstəkləyir

Azərbaycan Şanxay Əməkdaşlıq Təşkilatının (ŞƏT) dialoq üzrə mühüm tərəfdaşıdır.

"Report"un məlumatına görə, bu barədə Çinin Azərbaycandakı səfiri Lu Mey bazar ertəsi günü keçirilən mətbuat konfransında bildirib.

"Çin Azərbaycanın ŞƏT-də hüquqi statusunun yüksəldilməsini dəstəkləyir və təşkilatın beynəlxalq nüfuzunun artırılması məqsədilə Azərbaycanın ŞƏT çərçivəsində əməkdaşlıq təşəbbüslərini alqışlayır", - deyə diplomat bildirib.

Mey həmçinin vurğulayıb ki, Çin ticarət və investisiyalar, rəqəmsal iqtisadiyyat, kənd təsərrüfatı və yaşıl inkişaf da daxil olmaqla, müxtəlif istiqamətlərdə ikitərəfli və çoxtərəfli əməkdaşlıq səviyyəsinin yüksəldilməsi məqsədilə Azərbaycanla qarşılıqlı fəaliyyət üçün ŞƏT platformasından istifadə etməyə hazırdır.