Rusiyanın Oryol vilayətində neft anbarına hücum olub

Rusiyanın Oryol vilayətində neft anbarına dron hücumu olub.

“Report” xəbər verir ki, bu barədə “Astra” nəşri bildirib.

“Yerli sakinlərin sözlərinə görə, ilkin olaraq neft bazasına hücum edilib. Şahidlər azı bir yanacaq rezervuarının yandığını bildirirlər”, – məlumatda qeyd olunub.

Partlayış səslərindən öncə dron uğultusu eşidildiyi vurğulanıb.

Sözügedən regionun qubernatoru Andrey Klıçkov kütləvi dron hücumunun olduğunu təsdiqləyib, habelə “infrastruktur obyektində yanacaq alışmasının” olduğunu etiraf edib.

“Pilotsuz uçuş aparatlarının kütləvi hücumu nəticəsində infrastruktur obyektində yanacaq alışıb, vurulmuş PUA-ların qalıqları bir neçə fərdi evin pəncərələrini zədələyib”, – region başçısı teleqramda yazıb.

Bundan başqa, Rusiyanın Krasnodar diyarının da dron hücumuna məruz qaldığı deyilir. Məlumata görə, dronlardan birinin qalıqları fərdi evə düşüb. Hücumun törətdiyi mümkün fəsadlar barədə təfərrüatlar verilməyib.

Xatırladaq ki, dekabrın 11-də Rusiyanın Rostov və Bryansk vilayətlərindəki sənaye obyektlərinə dron hücumu olmuşdu.