Rusiya İstanbul görüşündə XİN-in xətti ilə təmsil olunacaq

Rusiya İstanbulda ABŞ nümayəndə heyəti ilə keçiriləcək görüşdə Xarici İşlər Nazirliyinin (XİN) xətti ilə təmsil olunacaq.

“Report” Rusiya mətbuatına istinadən xəbər verir ki, bu barədə ölkə prezidentinin mətbuat katibi Dmitri Peskov brifinqdə jurnalistlərə bildirib.

"Bizim tərəfimizdən bu, Xarici İşlər Nazirliyinin xətti ilə olacaq. Müvafiq olaraq, XİN-dəki həmkarlarımızdan məlumat gözləyin", - o qeyd edib.

Rusiya və ABŞ arasında strateji hücum silahları haqqında yeni müqaviləyə toxunan D.Peskov qeyd edib ki, hazırda bu məsələ ilə bağlı danışıqları təsəvvür etmək çətindir. Çünki strateji təhlükəsizlik, silahlanmaya nəzarət məsələləri üzrə danışıqlara başlama faktının özü ikitərəfli münasibətlərin və qarşılıqlı etimadın müəyyən səviyyəsini nəzərdə tutur.