Ukrayna Rusiyanın dialoq təklifini rədd edib - YENİLƏNİB

Ukrayna Rusiyanın dialoq təklifini rədd edib.

“Report” “RBK Ukraina”ya istinadən xəbər verir ki, bu barədə Ukrayna Prezident Ofisinin müşaviri Mixaylo Podolyak deyib.

Onun sözlərinə görə, Rusiya qoşunlarını Ukrayna ərazisindən çıxarana və törətdiyi hərbi cinayətləri etiraf etməyənədək rəsmi Kiyev Moskva ilə danışıqlara razı olmayacaq.

M.Podolyak bildirib ki, beynəlxalq hüququ və qlobal təhlükəsizlik nizamını pozan Rusiyadır: “Məhz işğalçı ölkə genişmiqyaslı, qanlı, səbəbsiz müharibəni başladıb. Digər ölkənin dinc əhalisinə qarşı terror təşkil edən məhz Rusiyadır. Rusiya danışıqlar istəyirsə, Ukraynadan çıxmalı, əməllərinə görə məsuliyyətə cəlb edilməli və ölkədə siyasi elita dəyişməlidir”.

Qeyd edək ki, Rusiya Prezidenti Vladimir Putin bu gün Moskvanın Kiyevlə danışıqlara hazır olduğunu, lakin ABŞ və NATO-nun buna imkan vermədiyini söyləmişdi.

“Rusiya böhranın nizamlanması üçün Ukrayna ilə dialoqa hazırdır”.

“Report” TASS-a istinadən xəbər verir ki, bunu Kremlin sözçüsü Dmitri Peskov deyib.

Onun sözlərinə görə, Ukrayna hazırda çətin vəziyyətdədir: “Buna baxmayaraq, rəsmi Kiyev fürsətləri qiymətləndirmir”.

Qeyd edək ki, Rusiya ilə Ukrayna arasında genişmiqyaslı müharibə ötən il fevralın 24-də başlayıb.