Aparıcı beynəlxalq təşkilatlar və ölkələr Qarabağdakı “seçkilər”i tanımadıqlarını elan ediblər

Qarabağ

12 Sentyabr , 2023 10:37

Aparıcı beynəlxalq təşkilatlar və dünyanın bir çox ölkələri erməni separatçılarının Xankəndidə keçirdiyi qondarma prezident seçkilərini pislədiklərini və tanımadıqlarını bəyan ediblər.

“Report”un məlumatına görə, "seçkilər"i tanımadıqlarını bəyan edən təşkilatlar və ölkələr siyahısına İslam Əməkdaşlıq Təşkilatı (İƏT), Türk Dövlətləri Təşkilatı (TDT), Avropa İttifaqı (Aİ), Avropa Şurası, həmçinin, Böyük Britaniya, ABŞ, Macarıstan, Rumıniya, Pakistan, Türkiyə, Gürcüstan, Ukrayna, Moldova və s. daxildir.

Böyük Britaniyanın Azərbaycandakı səfiri Ferqus Auld beynəlxalq hüququn prinsip və normalarının əhəmiyyətini vurğulayıb: “Biz Azərbaycanın suverenliyini və ərazi bütövlüyünü dəstəkləyirik”.

Macarıstan, Rumıniya və Moldova kimi Avropa ölkələri də separatçıların addımlarının qeyri-legitimliyi ilə bağlı oxşar bəyanatlar veriblər.

Aİ-nin Xarici Əlaqələr və Təhlükəsizlik Siyasəti üzrə Xidmətinin sözçüsü Nabila Massrali isə qeyd edib ki, Xankəndidə keçirilmiş qondarma seçkiləri diqqətə alaraq, Avropa İttifaqı bir daha bəyan edir ki, Qarabağdakı "seçkilər"in həyata keçirildiyi konstitusion və hüquqi çərçivəni tanımır.

İslam Əməkdaşlıq Təşkilatı (İƏT) dünya ictimaiyyətini Ermənistanın destruktiv addımlar atmasının qarşısını almaq üçün effektiv tədbirlər görməyə çağırıb. Üstəlik, Avropa Şurası, Türk Dövlətlərinin Parlament Assambleyası və digər beynəlxalq strukturların nümayəndələri də “seçkiləri” tanımadıqlarını bəyan ediblər.

Bu arada, İran “seçkiləri” birbaşa pisləməyib, lakin dünənki mətbuat konfransında bununla bağlı sualı cavablandıran İran Xarici İşlər Nazirliyinin rəsmi nümayəndəsi ölkəsinin Azərbaycanın suverenliyi və ərazi bütövlüyünü dəstəklədiyini və Qarabağı Azərbaycanın ayrılmaz hissəsi kimi tanıdığını bəyan edib.

Bu günə qədər Xankəndidə keçirilən “seçkilər”in qanunsuz olduğunu bəyan edən ölkə və təşkilatların siyahısı və bəyanatların qəbul edildiyi tarix:

Türkiyə - 9 sentyabr

Türk Dövlətləri Təşkilatı - 9 sentyabr

Türk Dövlətləri Parlament Assambleyası - 9 sentyabr

İslam Əməkdaşlıq Təşkilatı - 9 sentyabr

Aİ-nin Xarici Əlaqələr və Təhlükəsizlik Siyasəti üzrə Xidməti - 9 sentyabr

Ukrayna - 9 sentyabr

Moldova - 9 sentyabr

Gürcüstan - 10 sentyabr

Avropa Şurası - 10 sentyabr

Pakistan - 10 sentyabr

Böyük Britaniya - 10 sentyabr