Milli Məclisin deputatları TURKPA-nın komissiya iclasında iştirak edəcək

Milli Məclisin (MM) Səhiyyə Komitəsinin sədri Əhliman Əmiraslanov və deputat İlham Əliyеv TURKPA-nın ətraf mühit və təbii ehtiyatlar komissiyasının 5-ci iclasında iştirak etmək üçün mayın 28-dən 31-nə kimi Qırğızıstanın Biskek şəhərində səfərdə olacaqlar.

MM-in Mətbuat xidmətindən "Report"a verilən məlumata görə, iclası komissiyanın sədri, Azərbaycanın TÜRKPA-dakı nümayəndə heyətinin üzvü Əhliman Əmiraslanov açacaq. 

Gündəlik təsdiq edildikdən sonra “Təbii sərvətlərin ekoloji cəhətdən səmərəli istifadəsi: hüquqi dəstək” mövzusuna dair müzakirələr aparılacaq və bununla bağlı tövsiyə qərarı layihəsi təsdiq ediləcək.

Toplantıda komissiyanın 6-cı iclasının yeri, tarixi və gündəliyi də müzakirə olunacaq.

Komissiya üzvləri TÜRKPA-nın 10 illik yubileyinə həsr olunmuş foto-sərgi ilə tanış olacaqlar.