Voleybol üzrə "Zəfər Kuboku" keçiriləcək

Azərbaycan Voleybol Federasiyası 44 günlük Vətən müharibəsinə həsr olunan “Zəfər Kuboku” təşkil edəcək.

Federasiyanın Mətbuat Xidmətindən "Report"a verilən məlumata görə, aprelin 22-də kişi voleybolçular arasında start götürəcək yarışda Yüksək Liqada ilk dörd pillədə qərarlaşan “Murov”, “Neftçi”, MOİK və “Sərhədçi” komandaları mübarizə aparacaqlar.

Kubok uğrunda oyunlar 2 gün davam edəcək. Püşkə əsasən aprelin 22-də “Murov” voleybol klubunun idman zalında təşkil olunacaq yarışın ilk matçında “Neftçi” MOİK-lə üz-üzə gələcək. Görüş saat 15:00-da başlayacaq. Saat 17:00-da isə meydan sahibi “Sərhədçi”ni sınağa çəkəcək.

Olimpiya sistemi ilə keçiriləcək turnirdə məğlub komandalar mübarizəni dayandıracaqlar. Kubokun final matçı aprelin 23-də saat 15:00-da “Sərhədçi” Olimpiya İdman Mərkəzində təşkil olunacaq.

Qeyd edək ki, final oyunundan sonra Azərbaycan Yüksək Liqasında, Super Liqada, həmçinin I Liqada fərqlənənlərin mükafatlandırma mərasimi keçiriləcək. Ardınca 2021/2022 mövsümünün rəsmi bağlanışı olacaq.