MOK: İdmançılarımızın Olimpiadadakı uğurları daim yaddaşlarda qalacaq

İdmançılarımızın Yay Olimpiya Oyunlarındakı uğurları daim yaddaşlarda qalacaq.

“Report” xəbər verir ki, bu fikir Azərbaycan Milli Olimpiya Komitəsinin (MOK) feysbuk sosial şəbəkə hesabında paylaşımında yer alıb.

“Parisdə keçirilən XXXIII Yay Olimpiya Oyunları sona çatır, amma idmançılarımızın uğurları daim yaddaşlarda qalacaq! Sizi alqışlayırıq!”, - paylaşımda qeyd olunub.

Paris-2024-də Azərbaycan 48 idmançı ilə təmsil olunub. Yığma 15 idman növü üzrə 17 proqramda çıxış edib. Millimizin heyətində cüdoçular Hidayət Heydərov (73 kq) və Zelim Kotsoyev (100 kq) olimpiya çempionu olublar. Taekvondoçu Qaşım Maqomedov (58 kq), boksçu Alfonso Dominqes (92 kq) gümüş, yunan-Roma güləşçisi Həsrət Cəfərov (67 kq) və sərbəst güləşçilər Giorgi Meşvildişvili (125 kq) ilə Maqomedxan Maqomedov (97 kq) bürünc medala sahib çıxıblar.

İdmançılarımız yarışı 30-31-ci pillələrdə başa vurmaqla tarixinin ən yaxşı göstəricisinə imza atıb. Komandamız yarış cədvəlində sözügedən mövqeləri Xorvatiya ilə bölüşüb. 30-cu yer Azərbaycanın olimpiadalar tarixində ən yaxşı göstəricisi olub. Belə ki, ölkəmiz 32-ci yeri tutduğu London-2012 Yay Olimpiya Oyunlarındakı göstəricini üstələyib.