Bakıda müntəzəm marşrutlara 2 mindən artıq avtobus əlavə olunub

Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyi (AYNA) ictimai nəqliyyatın hərəkətinin tənzimlənməsi, daşıma imkanlarının artırılması istiqamətində paytaxtın bir sıra ərazilərində tədbirlər həyata keçirib.

"Report" bu barədə nazirliyə istinadən xəbər verir.

Məlumata görə, “28 May” metrostansiyası ətrafında yolun hərəkət hissəsində dayanma-durma qaydalarını pozan nəqliyyat vasitələri yığışdırılmaqla ictimai nəqliyyatın hərəkətində fasiləsizlik təmin edilib.

Analoji tədbirlər “Koroğlu” metrostansiyasının qarşısında da görülüb. Kənar müdaxilə nəticəsində vaxtilə əraziyə yerləşdirilən beton məhəccərlər yığışdırılıb və avtobusların dayanacağa yaxınlaşması üçün şərait yaradılıb.

Sərnişindaşıma imkanlarının artırılması üçün daşıma göstəricisi aşağı olan marşrutlara avtobuslar əlavə olunur. Ötən gün Bakı şəhərində müntəzəm avtobus marşrutlarına 2 011 ədəd nəqliyyat vasitəsi çıxarılıb. Bu gün isə xəttə əlavə 277 avtobus cəlb edilib.

Paytaxtın mobillik imkanlarının yaxşılaşdırılması və ictimai nəqliyyatın əlçatanlığının təmin olunması istiqamətində tədbirlər bundan sonra da davam etdiriləcək.