Azərbaycanın İran Astarasındakı yük terminalında gördüyü işlər üzrə son vəziyyət açıqlanıb

“Azərbaycan Dəmir Yolları” QSC İran Astarasındakı yük terminalının ərazisində inşa etdiyi taxıl terminalı üzrə işləri 98%, konteyner platforması üzrə işləri isə 40% yerinə yetirib.

“Report” xəbər verir ki, bu barədə Nazirlər Kabinetinin 2021-ci ildə fəaliyyəti haqqında hesabatda bildirilir.

Sənəddə deyilir ki, Şimal-Cənub Beynəlxalq Nəqliyyat Dəhlizi çərçivəsində 1ədəd iki aşırımlı Bağçasaray körpüsü və 1400 pm uzunluğunda dəmiryol xəttinin tikintisi tamamlanıb, terminalın giriş hissəsində üç aşırımlı Kəmərbəndi körpüsünün tikinti-quraşdırma işlərinin 70 %-i yerinə yetirilib.

Terminal daxilində ümumi uzunluğu 7,7 km dəmiryol xətti inşa olunub, 17 ədəd yoldəyişən quraşdırılıb, sahəsi 1 800 m2 yükdoldurma-yükboşaltma platforması və 300 m2 gömrük binası inşa olunaraq istifadəyə verilib, sahəsi 1 600 m2 olan ofis binasının tikkinti-quraşdırma işləri 55% yerinə yetirilib. Terminalının ərazisindən keçən Virmuni çayının məcrasının dəyişdirilməsi və üzərindən 4 ədəd bir aşırımlı dəmiryol körpüsünün, 1 ədəd bir aşırımlı avtomobil yolu körpüsünün tikintisi üzrə işlərin 65 %-i icra edilib.