Ötən il Azərbaycanda 15 nəfər gömrük orqanlarından xaric edilib

Bakı. 30 yanvar. REPORT.AZ/ "2018-ci ildə Azərbaycan gömrük sistemində aparılan struktur dəyişiklikləri ilə əlaqədar kadr potensialından səmərəli şəkildə və uyğun olan sahədə istifadə olunması işi həyata keçirilib".

“Report”un məlumatına görə, bunu Dövlət Gömrük Komitəsi sədrinin I müavini İsmayıl Hüseynov bu gün gömrük əməkdaşlarının peşə bayramı münasibəti ilə bağlı keçirilən kollegiya iclasında Komitənin 2018-ci ilin yekunlarına dair çıxışında bildirib.

Onun sözlərinə görə, il ərzində 382 nəfər işə qəbul edilib, 445 nəfər əməkdaş işdən azad edilib, 417 nəfər tutduğu vəzifədən yüksək vəzifəyə təyin edilib, 58 nəfər isə tutduğu vəzifədən aşağı vəzifəyə keçirilib: “Eyni zamanda bildirmək istərdim ki, aparılan və kadr islahatlarının davamı olaraq DGK sistemində kadrların düzgün seçilməsi, yerləşdirilməsi, vəzifəli şəxslərin tutduğu vəzifəyə uyğun gəlib-gəlmədiyinin müəyyənləşdirilməsi, onların potensial imkanlardan istifadə etmək mümkünlüyünün aşkara çıxardırlması və peşə səriştəliyinin artırılmasının stimullaşdırılması məqsədilə muvafiq qanunvericiliyə uygun olaraq, 1 446 əməkdaşın Komitə sədrinin müvafiq sərəncamı ilə attestasiyası keçirilib”

İ. Hüseynov bildirib ki, hesabat dövründə gömrük orqanlarına xidmətə qəbul üçün müraciətlər əsasında təşkil olunmuş test imtahanlarında 1342 nəfər iştirak edib, təsdiq olunmuş qaydalara uyğun olaraq, 294 nəfər daha yüksək bal toplayanlar növbəti müsabiqə mərhələsinə buraxılıb, müsabiqədən keçənlər aidiyyəti üzrə vakant vəzifələrə təyin olunub: “Gömrük orqanı əməkdaşlarının fəaliyyətində müvafiq qanunvericiliyin tələblərinə əməl edilməsi, xidməti intizama riayət olunması üzərində nəzarətin təmin edilməsi, pozuntu hallarının vaxtında aşkar olunub aradan qaldırılması sahəsində konkret tədbirlər həyata keçirilib. Komitəyə daxil olmuş müraciətlər, audit yoxlamalarının nəticələri və vətəndaşların qəbulu zamanı qaldırılan məsələlərə dair xidməti araşdırmalar aparılmış, araşdırmalar zamanı aşkar edilmiş xidməti pozuntulara yol verdiklərinə görə 316 gömrük orqanı əməkdaşı intizam məsuliyyətinə cəlb edilib. Bunlardan 15 nəfər gömrük orqanlarından xaric edilib, 5 nəfər tutduğu vəzifədən azad edilib, 6 nəfər aşağı vəzifəyə keçirilib, 5 nəfərin xüsusi rütbəsi bir pillə aşağı salınıb, 68 nəfərə sonuncu xəbərdarlıqla şiddətli töhmət, 171 nəfərə töhmət elan edilib, 46 nəfərə irad tutulub”.