"Qarabağ"ın legioneri: "Cavab görüşündə "Qəbələ" istəkli deyildi"

"Qarabağ"ın futbolçusu Kevin Medinanın "Report"a müsahibəsi

- Azərbaycan Kubokunun 1/4 finalında "Qəbələ"ni mübarizədən kənarlaşdırdınız. İlk görüşdə 3:1, cavab matçında isə 3:0 hesablı qələbə qazandınız. Bu görüşlərin asan keçdiyini düşünürsünüzmü?

- İki oyunun nəticələrinə baxanda qələbəmiz asan görünə bilər. Amma asan qarşılaşma yoxdur. "Qəbələ" hörmətə layiq komandadır. Lakin hər iki görüşdə üstün tərəf biz idik.

- Cari mövsüm bir çox görüşdə böyük hesablı qələbələr qazanmısınız. Premyer Liqadakı digər komandalarla səviyyə fərqi o qədərmi çoxdur?

- Xeyr. Bugünkü futbolda bir komanda digərini məğlub edirsə, başqa səbəbləri var. Yaxşı nəticə hər komandanın səviyyəsi yox, konsentrasiya və qələbə istəyi ilə əlaqədardır. Çempionatdakı komandalar arasında səviyyə fərqi çox deyil.

- Yəni, "Qəbələ" sizinlə matçlarda oyuna köklənə bilmədi?

- Cavab matçında birinci oyundakı istəklərini hiss etmədim.

- Premyer Liqanın XV turunda "Neftçi" ilə qarşılaşacaqsınız. Bu görüş haqqında nə deyə bilərsiniz?

- Hər iki komanda üçün gözlənilən qarşılaşmadır. Çox maraqlı oyun olacaq. Bundan əvvəlki iki görüşdə hər komanda bir qələbə qazanıb və turnir cədvəlində də bir-birilərinə yaxındırlar.

- Bu görüşdə hansı nəticə qeydə alına bilər?

- Həqiqətən bu barədə bir fikrim yoxdur. Ancaq qarşıda hədəflərimiz var. İnanıram ki, istədiyimiz nəticəni qazana biləcəyik.

- Rəqibinizin güclü tərəflərini bilirsiniz?

- Hansısa komandanı analiz edən futbolçu deyiləm. Amma "Neftçi"nin yaxşı oyunçuları, yarımmüdafiəsi və kollektivi var.

- Bu görüş çempionun taleyinə nə dərəcədə təsir edəcək?

- Qarşıda Premyer Liqanın hələ çox oyunu var. Amma şübhəsiz ki, qələbə qazansaq, bir az üstünlük əldə edəcəyik.

- "Neftçi" kubokda mübarizəni dayandırıb. Bu amil qarşıdakı görüşdə rəqibinizə mənfi təsir edə bilərmi?

- Belə düşünmürəm. Onlar da çempionluğu hədəfləyiblər. Kubokda uduzsalar da, artıq Premyer Liqaya daha çox konsentrasiya olublar.