"Neftçi”nin toplanışdakı ikinci rəqibi dəyişdi

“Neftçi”nin Sloveniyadakı təlim-məşq toplanışında keçirəcəyi ikinci yoxlama oyununda rəqibi dəyişib.

"Report" paytaxt təmsilçisinin rəsmi saytına istinadən xəbər verir ki, Macarıstanın “Fehervar” klubu zədəlilərinin çoxluğu ilə əlaqədar sınaq matçından imtina edib.

Buna görə də “ağ-qaralar” iyunun 24-də Sloveniyanın “Domjale” klubu ilə qarşılaşacaq. “Domjale” stadionunda baş tutacaq görüş Bakı vaxtı ilə saat 20:00-da start götürəcək və “Neftçi TV” vasitəsilə canlı yayımlanacaq.

Qeyd edək ki, Sloveniyanın Kranska Qora bölgəsindəki “Ramada Hotel & Suites”də məskunlaşan ölkə çempionu ilk yoxlama oyununu iyunun 21-də “Kodeljevo Sport Ljubljana” stadionunda yerli “Olimpiya” (Lyublyana) klubuna qarşı keçirib - 1:1. Flaqman iyunun 29-u Moskva “Spartak”ı ilə üz-üzə gələcək.