Yaşar Bəşirov Dünya Şotokan Federasiyasının prezidenti seçilib

Yaşar Bəşirov Dünya Şotokan Federasiyasının (WSF) prezidenti seçilib.

"Report"un məlumatına görə, WSF-nin vitse prezidenti və İdarə heyətinin üzvü olan Y.Bəşirov Türkiyənin İstanbul şəhərindəki dünya çempionatından əvvəl təşkilatın yığıncağında yekdilliklə səsvermənin qalibi olub.

O həmçinin Dünya Karate Federasiyası (WKF) Texniki Komitəsinin və Avropa Karate Federasiyası (EKF) İdarə Heyətinin üzvüdür.

Daha bir əlamətdar hadisə WSF-nin İdarə heyətinin yeni tərkibində təşkilatın Azərbaycanda rəsmi nümayəndəsi Rənad Əliyevin də yer alması olub. Bu böyük etimada əsas səbəb Azərbaycanın idman tədbirləri və təşkilatçılıq işlərində təcrübəsinin dünyada yüksək dəyərləndirilməsidir.

Türkiyə Karate Federasiyasının prezidenti vəzifəsinə namizədlərdən Ercüment Taşdemir isə WSF-nin baş katibi seçilib.

Yığıncaqda təşkilatın inkişaf etdirilməsinə dair bir sıra məsələlər müzakirə edilib.

Qeyd edək ki, 5 qitədən 75 dövlət WSF-nin rəsmi üzvüdür. Son illər təşkilatın idarə edilməsində dəyişikliklər WSF-nin nüfuzunu artırıb. Qarşıdakı illərdə karatenin şotokan istiqamətində böyükmiqyaslı işlər görülməsi və yarışların sayının artırılması nəzərdə tutulub.