Tokio-2020: Azərbaycanın 35 idmançısı çıxışını bitirib, 4-ü medal əldə edib - SİYAHI

Azərbaycanın daha 5 idmançısı Tokio-2020 Yay Olimpiya Oyunlarında mübarizəyə start verib.

"Report"un məlumatına görə, yarışın növbəti günündə medal qazanmağa namizədlərdən hesab edilən qadın güləşçi Mariya Stadnik, sərbəst güləşçilər Hacı Əliyevlə, Şərif Şərifov və karateçi Rafael Ağayev qüvvəsini sınayıb. Həmçinin bədii gimnast Zöhrə Ağamirova da öz bacarığını göstərməyə çalışıb.

50 kq çəki dərəcəsində çıxış edən Stadnik 1/8 finalda Rusiya Olimpiya Komitəsinin (OKR) təmsilçisi Stalvira Orşuşla üz-üzə gəlib. Rəqibinə 9:7 hesabı ilə qalib gələn Stadnik 1/4 finalda Tunis təmsilçisi Sarra Hamdidən üstün olub - 10:0. Yarımfinalda yaponiyalı Yui Susakiyə uduzan Stadnik bürünc medal uğrunda güləşəcək.

65 kq-da mübarizə aparan Hacı Əliyev əvvəlcə seneqallı Adama Diatta, ardınca isə qazaxıstanlı Daulet Niyazbekov üzərində qələbə qazanaraq, yarımfinala yüksəlib. Bu mərhələdə hindistanlı Bacranq Puniyanı məğlub edən 3 qat dünya və 3 qat Avropa çempionu finalda yaponiyalı Takuto Otoquro ilə görüşəcək.

97 kq çəkidəki Şərif Şərifov OKR-in digər təmsilçisi 1/8 finalda Abdulrəşid Sadullayevlə bacarmayıb. Lakin rəqibi finala çıxdığından olimpiya çempionu bürünc medal uğrunda mübarizə aparacaq.

75 kq-dakı Rafael Ağayev B qrupunda ardıcıl olaraq almaniyalı Noa Biç, avstraliyalı Çuneari Yahiro və qazaxıstanlı Nurkanat Ajiqanov üzərində qələbə qazanan 5 qat dünya və 11 qat Avropa çempionu son görüşdə italiyalı Luici Busa uduzsa da, yarımfinala vəsiqə qazanıb. Bu mərhələdə macarıstanlı Qabor Karoli Harspatakiyə qalib gələn karateçi finalda Busa ilə münasibətlərinə aydınlıq gətirib. Qrupdakı görüşdə Busaya uduzan Ağayev bu dəfə rəqibi ilə bacarmayıb.

Fərdi proqramda yarışan bədii gimnast Zöhrə Ağamirova isə halqa ilə çıxışda 23,000 xalla 16-cı, topla 23,400 xalla 17-ci, lentlə 19,900 xalla 15-ci, gürzlə isə 21,500 xalla 21-ci yeri tutub. 4 hərəkətin cəmində 87,800 xal toplayan 20 yaşlı idmançı 18-ci yeri tutub və finala adlaya bilməyib.

Beləliklə, Azərbaycanın 35 təmsilçisi Tokio-2020-də çıxışını başa vurub. Onlardan 4-ü medal qazanıb, biri isə ən azı gümüş medalı təmin edib.

Medal qazananlar

Cüdo: İrina Kindzerska (+78 kq) - bürünc

Boks: Alfonso Dominges (81 kq) - bürünc

Yunan-Roma güləşi: Rafiq Hüseynov (77 kq) - bürünc

Karate: Rafael Ağayev (75 kq) - gümüş

Medal qazana bilməyənlər

Cüdo: Kəramət Hüseynov (60 kq), Orxan Səfərov (66 kq), Rüstəm Orucov (73 kq), Murad Fətiyev (81 kq), Məmmədəli Mehdiyev (90 kq), Zelim Kotsoyev (100 kq), Uşangi Kokauri (+100 kq) Aişə Qurbanlı (48 kq)

Boks: Tayfur Əliyev (57 kq), Cavid Çələbiyev (63 kq), Lorenso Sotomayor (69 kq), Məhəmməd Abdullayev (+91 kq)

Taekvondo: Milad Beigi Hərçəqani (80 kq), Fəridə Əzizova (67 kq)

İdman gimnastikası: İvan Tixonov, Marina Nekrasova

Üzgüçülük: Maksim Şemberev, Məryəm Şeyxəlizadə Xangah

Güllə atıcılığı: Emin Cəfərov

Triatlon: Rostislav Pevtsov

Qılıncoynatma: Anna Başta

Badminton: Edi Reski Dviçayo

Velosiped idmanı: Elçin Əsədov

Çəkicatma: Anna Skidan

Atıcılıq: Ruslan Lunyov

Atletika: Nazim Babayev (üç təkanla tullanma)

Karate: Firdovsi Fərzəliyev (67 kq)

Yunan-Roma güləşi: İslam Abbasov (87 kq)

Qadın güləşi: Elis Manolova (68 kq)

Sərbəst güləş: Turan Bayramov (74 kq)

Bədii gimnastika (fərdi çoxnövçülük): Zöhrə Ağamirova

Gözləyənlər

Sərbəst güləş: Hacı Əliyev (65 kq) - final, Şərif Şərifov (97 kq) - təsəlliverici görüş

Qadın güləşi: Mariya Stadnik (50 kq) - bürünc medal görüşü

Bədii gimnastika (qrup hərəkətləri): Zeynəb Hümmətova, Ləman Əlimuradova, Nərminə Səmədova, Yelizaveta Luzan, Darya Sorokina

Karate: İrina Zaretska (+61 kq).