Ella Gibson: "Avropa Oyunlarında rekord qırmağım yaxşı mənada təəccübləndirdi"

"Təəssüratlar inanılmazdır. Açığı, rekord qırmağım məni yaxşı mənada təəccübləndirdi, çox gözəl nəticədir".

Bunu "Report"un Polşaya ezam olunmuş əməkdaşına açıqlamasında III Avropa Oyunlarında qadınların kamandan oxatma üzrə fərdi təsnifat mübarizəsində 715 xal toplayaraq dünya rekorduna imza atan böyük britaniyali Ella Gibson deyib.

23 yaşlı idmançı yarışa ciddi hazırlaşdığını bildirib: "Sevindirici haldır ki, təsnifatda yüksək xallar toplayıb dünya rekordunu yenilədim. Özümü möhtəşəm hiss edirəm".

O, yarışda ən ciddi rəqibinin danimarkalı Tanya Yensen olduğunu söyləyib: "Bütün idmançılar özlərini yaxşı tərəfdən göstərdilər. Amma Tanyanı xüsusi qeyd etməliyəm".