Azərbaycan şahmatçıları Avropa çempionatında komanda hesabında birinci olublar

Azərbaycanın yeniyetmə şahmatçıları Rumıniyanın Mamaya şəhərində keçirilən Avropa çempionatında komanda hesabında birinci olublar.

"Report"un məlumatına görə, yığma buna 4 qızıl, 2 gümüş və 1 bürünc medal qazanmaqla nail olub.

Turnirdə mükafatlandırma mərasimi də baş tutub. Qalib və mükafatçılara medal, diplom, o cümlədən kubok təqdim edilib. Çempion şahmatçılarımızın şərəfinə 4 dəfə Azərbaycan himni səsləndirilib.

Xatırladaq ki, Avropa çempionatında Məhəmməd Kazımzadə, Mehriban Əhmədli, Əhməd Xaqan, Rüstəm Rüstəmov qızıl, Ayan Allahverdiyeva və Xəzər Babazadə gümüş, Səadət Bəşirli isə bürünc medal əldə edib. Azərbaycan şahmatçıları ilk dəfə yeniyetmələrin qitə çempionatında 4 qızıl medal qazanmaqla rekord nəticəyə imza atıblar.