Ötən il SOCAR neft ixracını 2,2 dəfə artırıb

Ötən il Azərbaycan Dövlət Neft Şirkəti (SOCAR) neft ixracını 2,2 dəfə artıraraq 3,1 milyon tona çatdırıb.

“Report” xəbər verir ki, bu barədə Energetika Nazirliyinin 2023-cü il üzrə açıqladığı operativ məlumatlarında deyilir.

2023-cü ildə Azərbaycan Beynəlxalq Əməliyyat Şirkəti (ABƏŞ) 22,1 milyon tona yaxın neft ixrac edib. Bu, 2022-ci illə müqayisədə 2,8 milyon ton və ya 11,2 % azdır.

Hesabat dövründə ümumilikdə Azərbaycandan xarici ölkələrə 25,2 milyon ton neft (kondensatla birlikdə) ixrac olunub. Bu, 2022-ci illə müqayisədə 1,1 milyon ton və ya 4,2 % azdır.

Qeyd edək ki, Azərbaycan sahillərindən təxminən 100 km aralıqda yerləşən “Azəri-Çıraq-Günəşli” yataqlar blokundan ilk neft 1997-ci ildə hasil olunub.

Yataqlar blokunun işlənməsi üzrə hasilat bölgüsünə dair ilk müqavilə 1994-cü ilin 20 sentyabr tarixində imzalanıb. 2017-ci ilin 14 sentyabr tarixində isə həmin yataqların birgə istismarına və hasilatın pay bölgüsünə dair yeni saziş imzalanıb. Bu saziş yataqların 2049-cu ilin sonunadək işlənməsini nəzərdə tutur.

AÇG-də BP (30,37 %), SOCAR (25 %), “MOL Group” (9,57 %), INPEX (9,31 %), “Equinor” (7,27 %), “ExxonMobil” (6,79 %), TPAO (5,73 %), ITOCHU (3,65 %), “ONGC Videsh Limited” (OVL) (2,31 %) pay sahibidir.