Türkiyə-Azərbaycan Universitetində tədris ingilis və türk dilində aparılacaq

Türkiyə-Azərbaycan Universitetində tədris ilk mərhələdə ingilis və türk dilində aparılacaq.

"Report" xəbər verir ki, bunu elm və təhsil nazirinin müşaviri Nicat Məmmədli deyib.

O bildirib ki, hazırda Azərbaycan və Türkiyənin bir çox ali təhsil müəssisələri arasında əməkdaşlıq mövcuddur: "Bu layihədə iştirak edəcək universitetlər də reytinqli ali təhsil müəssisələri olacaq".

Müşavir qeyd edib ki, ilkin mərhələdə Türkiyə-Azərbaycan Universitetində bakalavr pilləsi üzrə tələbə qəbulunun aparılması nəzərdə tutulur.

N.Məmmədli söyləyib ki, tədris prosesi ilə bağlı bütün detallar tam məlum olandan sonra ictimaiyyətə ətraflı məlumat veriləcək.